.

*

LA  FOLIE

DES  GORRIERS

*

.

Cette sottie moralisée fut écrite en Normandie vers 1470. Le gorrier, pain bénit des satiristes, est un provocateur qui adopte les extravagances vestimentaires les plus inconfortables pour se faire remarquer. La pièce place les gorriers sous l’emprise de Folie, un personnage allégorique inhérent aux sotties.

Source : Bibliothèque nationale de France, manuscrit Rothschild 3007, fin XV^e siècle. Le copiste semble être lui-même sous l’emprise de Folie : 1> Il transcrit le pluriel « ils » par « il ». 2> Ses verbes ne font pas leur pluriel en -ent mais en -et (« il se premenet » = ils se promènent). 3> Il ajoute un « s » à la fin de mots au singulier (leurs chasteté, leurs vie), et un « e » à la fin d’adjectifs masculins ou de gérondifs (je ne prendrai pas la peine de relever ces manies dans les variantes). 4> Non content d’ajouter une multitude de lettres superflues, il omet des lettres essentielles, des mots, et même des vers. 5> Il note -ent au lieu de -ant, et vice versa. 6> Il ne copie pas les refrains des triolets. 7> Il écrit « quent » au lieu de « quand », mais pas partout. 8> Il insère souvent les didascalies après coup, en pattes de mouches, et quelquefois dans la marge, à côté de vers qui n’ont aucun rapport avec elles. Saluons l’édition qu’Émile Picot donna de ce manuscrit peu commode dans son Recueil général des sotties (tome I, 1902, pp. 137-175), et regrettons qu’il ne lui ait consacré que treize notes. Je lui emprunte un certain nombre de corrections, tout en corrigeant les fautes de lectures qu’il a laissé passer. Je publie sous la pièce une cochonnerie inédite provenant du même manuscrit.

Structure : Rimes abab/bcbc, rimes plates, avec 2 triolets, 5 rondeaux, 5 quatrains à refrain, et une péroraison en huitains abaabbcc.

Cette édition : Cliquer sur Préface. Au bas de cette préface, on trouvera une table des pièces publiées sur le présent site.

.

*

Farce nouvelle nommée

la Folie des Gorriers

*

À .IIII. personnaiges :

       LES   [DEUX]  GORRIERS

       et  FOLIE

       et  LE  FOL

*

                        LE  PREMIER  GORRIER ¹               SCÈNE  I

        Bastard² !

                        [LE]  SECOND  [GORRIER]

                          Barbier !

                        LE  PREMIER ³

                                          Où sont ces paiges ?

        Se je metz la main sur leur[s] teste[s]⁴,

        Je croy…

                        LE  SECOND

                         Par ma foy ! aux villaiges⁵.

                        [ LE  PREMIER

        Bastard !

                        LE  SECOND

                          Barbier !

                        LE  PREMIER

                                           Où sont ces paiges ?

                        LE  SECOND ]

5      Pour quérir poulles et formaiges⁶,

        Et du foing⁷ pour passer ces festes.

                        LE  PREMIER

        [ Bastard !

                        LE  SECOND

                           Barbier !

                        LE  PREMIER

                                           Où sont ces paiges ?

                        LE  SECOND

        Se je metz la main sur leurs testes…

                        LE  PREMIER ]

        Cuydent-il que nous s[o]yons bestes ?

                        FOLIE ⁸

10    (On les puist mener au gibet

        S’il ont⁹ ny paige ny varlet !)

                        LE  SECOND

        Que ditz-tu, compaignon de guerre ?

        Comment te va ?

                        LE  PREMIER

                                      Non guyères¹⁰ bien.

                        LE  SECOND

        Pourquoy ?

                        LE  PREMIER

                             Une pièce de terre

15    [Du my]en¹¹ ay vandue.

                        LE  SECOND

                                                 Et combien ?

                        LE  PREMIER

        N’am parlons plus.

                        LE  SECOND

                                        Et moy le myen¹²,

        Tant qu[e j’]en suis au pain quérant¹³.

                        FOLIE

        (Et ! il ont ung estronc de chien !

        Oncques n’eurent ung blanc¹⁴ vaillant.)

                        LE  SECOND

20    Le mestier est mal acquérant¹⁵ ;

        Trouver nous fault aultre practique.

                        LE  PREMIER

        Par mon serment, j’en suis contant !

        Ne m’en chault à quoy je m’aplicque,

        Se ne¹⁶ fait-il mal.

                        LE  SECOND

                                        D’une picque

25    On me bailla ung tel soufflet

        Sur le chief, pour le Bien publicque¹⁷ !

                        FOLIE

        (Et ! on fit son sanglant gibet !)

                        LE  PREMIER

        Trouvé me suis, chascun le scet,

        En mainte course¹⁸ et dur assault.

                        LE  SECOND

30    J’ay mys mon chief sans bassinet¹⁹

        En lieu qu’ung²⁰ aultre, tant soit cault,

        N’oseroit.

                        LE  PREMIER

                          Ung gendarme vault,

        Qui²¹ a sens avecques vaillance.

                        FOLIE

        (Par le Dieu qui ne ment ne fault²² !

35    Il ne portèrent oncques lence.)

                        LE  SECOND

        J’ay vandu toute ma chevence²³

        Affin de myeux m’entretenir.

                        LE  PREMIER

        J’eusse trouvé bonne allience,

        Maiz aultre n’ay volu tenir²⁴.

                        LE  SECOND

40    J’ay tué.

                        LE  PREMIER

                        J’ay fait convenir²⁵,

        Dont m’en reppens.

                        FOLIE

                                         (Quel coquinaille !

        Argent²⁶ bien peult le[s] retenir,

        Et pour leur esta[t], la poullaille²⁷.)

                        LE  SECOND

        Et ! que veulx-tu ?

                        LE  PREMIER

                                       Tant de merdaille²⁸

45    Appointés comme chevalliers,

        Et les vaillans qui n’ont pas maille²⁹

        Recullés comme lanterniers³⁰ !

                        LE  SECOND

        Brief, il nous fault estre gorriers,

        Se nous voulons plus hault mo[n]ster.

                        FOLIE

50    (Qui auro[i]t beaucop de deniers,

        C’est grand plaisir de les conter³¹.)

                        LE  PREMIER

        De quelc’un nous fault acointer,

        Par qui nous puissions valloir mieulx.

                        LE  SECOND

        Se bien nous voulons appointer³²,

55    Devenir nous fault amoureux.

                        LE  PREMIER

        Je feroye bien du gracieux.

        Maiz où nous pourrons-nous percher ?

                        LE  SECOND

        À Paris³³ a de plaisans lieux,

        Qui bien les [y] sauroit sercher³⁴.

                        Folie se premaine.³⁵

                        LE  PREMIER

60    Je voy là ne sçay qui marcher :

        Assez souffisante est³⁶ darrière,

        Et a couraige³⁷.

                        LE  SECOND

                                    Au remarcher³⁸,

        Je cuyde qu’elle soit gorrière.

                        LE  PREMIER

        Quant je regarde sa manière,

65    Elle me plaist. Allons vers elle !

                        LE  SECOND

        Allons !

.

                        LE  PREMIER                                       SCÈNE  II

                       Dieu vous gard, damoiselle !

                        FOLIE

        Et vous aussi !

                        LE  SECOND

                                  Vous estes celle

        Qui a mys mon cueur en ses las³⁹.

                        LE  PREMIER

        Dame, vostre suis, hault et bas.

70    Commandez, vous serez servie⁴⁰.

                        FOLIE

        Messeigneurs, de ce vous mercye.

        Comment estes-vous cy⁴¹ venus ?

                        LE  SECOND

        Deux pouvres sommes desprovus⁴²

        Compaignons pour servir le Roy,

75    Où tout avons perdu. Maiz quoy !

        Encore avons-nous quelque drame⁴³.

                        FOLIE

        Je vous entens. Dea ! je suis femme

        De plusieurs prisée et chér[i]e.

                        LE  PREMIER

        Plaise-vous⁴⁴ donc estre m’amye,

80    Car de vostre amour suis surpris.

                        FOLIE

        De bien grans en onst esté pris,

        [Tant chevalliers que gros marchans.]⁴⁵

                        LE  SECOND

        Maiz commant vinttes-vous céans

        Seulète ? Y av’ous⁴⁶ congnoissance ?

                        FOLIE

85    Pource que j’ayme ma plaisance,

        Je vois⁴⁷, je vie[n]s, je m’abba[n]donne

        À celluy qui s’amour me donne.

        Et où me plaist, soit pluye ou vent,

        Je m(e) arreste le plus souvent :

90    Car je suis libéralle et franche.

                        LE  PREMIER

        Et où vous tenez-vous ?

                        FOLIE

                                               En France⁴⁸,

        En Flandre[s] et en Picardie,

        En Anglecterre, en Normendie,

        À Romme, Ytalie et Espaigne,

95    Où je veul, et en Allemaigne.

        Et si, suis partout dominans.

                        LE  SECOND

        Et en quelz maisons ?

                        FOLIE

                                            Au[x] plus grans :

        Ès cours des princes et seigneurs.

        Et avec(ques) les dissimulleurs⁴⁹

100  [Suis] bien souvent, en plusieurs cas,

        Combien qu’il ne le cuydent pas :

        Car souvent, soubz fainte loquence⁵⁰,

        Revestent⁵¹ l’abbit de Prudence ;

        Maiz leurs ditz et leurs faiz sont pris

105  En la cresme de mes escrips⁵².

        Et suis souvent, à leurs requestes,

        Soubz leurs chapperons, dans⁵³ leurs testes.

        Entre chappeaux, crosses et mistres⁵⁴

        Me trouverez en ces chappistres⁵⁵,

110  En faisant les élections :

        Car j’en fay les conclusions.

        Et entre les estudïens,

        Et avec(ques) les .IIII. Mandiens⁵⁶.

        Et bien souvent vous me verrez

115  Dessoubz les chapperons fourréz⁵⁷.

        Puis m’entreboute⁵⁸, que[nt] je veulx,

        En la teste et⁵⁹ dans les cheveulx

        Des femmes, ainsi qu’en⁶⁰ vobis ;

        Et leur faitz porter telz habitz

120  Que je vueil, don[t] on [les suspecte]⁶¹

        Qu’ilz font leur chasteté suspecte.

        Et quent je me metz en leur teste,

        Oncques ne fut telle tempeste !

        Puis me mesle d’astrologie.

125  Quant je suis avec Theologie⁶²,

        Avec les sept Ars libéraux,

        Le feu de⁶³ quatre mareschaux

        N’en approche point de challeur⁶⁴.

        Brief, il n’y a si grand seigneur

130  Qui bien ne me veulle⁶⁵ accointer

        Pour ung⁶⁶ aultre désapointer,

        Car itelle⁶⁷ est ma destinée.

                        LE  PREMIER

        Et dont⁶⁸ estes-vous ?

                        FOLIE

                                             Je fuz née

        Au fons de Paradis terrestre⁶⁹.

                        LE  SECOND

135  Ce que dictes ne pourroit estre :

        Vous n’avez pas .XXV. ans.

                        FOLIE

        J’en ay plus de six mil [cinq cens]⁷⁰ :

        Je suis celle, pour toute somme,

        Par qui Adan menga la pomme.

140  Je fiz⁷¹ faire la tour Babel,

        [Et] aux lions bailler Daniel⁷² ;

        Mectre Virgille en la corbeille⁷³,

        Sallomon « chevaucher sans selle⁷⁴ » ;

        Par Dalida, [en traïzon]⁷⁵,

145  Copper les cheveux de Sanxon ;

        En Égipte, par Tholomée⁷⁶,

        Coupper la teste de Pompée.

        Hélaine à⁷⁷ Pâris fitz ravir,

        Et Lucresse⁷⁸ [je] fitz morir.

150  J’ay fait vandre des béneffices

        Pour venir pourchasser⁷⁹ offices.

        Plusieurs [se tiennent à saigesse]⁸⁰,

        Maiz la fin en sera mestresse.

        [Quant] je me treuve en divers lieux,

155  Je faiz dancer⁸¹ les amoreux,

        Et despandre⁸² dans ung esté

        Ce qu’en travail ont aquesté

        Leurs parens ou⁸³ temps de leur vie.

        Chascun de m’avoir a envye ;

160  D’avoir fous [et so]tz il me chault.

                        LE  PREMIER

        Vous estes tout ce qu’il nous fault.

        Qu’en ditz-tu ?

                        LE  SECOND

                                  C’est bien mon advys.

                        FOLIE

        Quant je vueil, je m’espannoÿs⁸⁴

        Ès cueurs qui sont de moy navrés⁸⁵.

                        LE  PREMIER

165  Comme avez non⁸⁶ ?

                        FOLIE

                                           Vous le sçaurez

        Avent que départez de moy.

        Maiz  à mon adviz, comme je croy,

        À mon habit et à mon renom

        Povez bien congnoistre mon nom.

170  Lisez-le, je l’ay fait escripre.

                        « Folie » est en escript sur sa manche.

                        LE  SECOND

        Or brief, nous ne le sçaurions lire,

        Car ce sont sauvaiges escrips⁸⁷.

                        FOLIE

        Vous ne sçavez dont qui je suis ?

        Pour vostre auctorité acroistre,

175  Faictes bien de me mescongnoistre ;

        Vous y serez à temps assez.

        Or çà ! qu’en dictes-vous ?

                        Nota qu’il la regardent souvent, et dient :

                        LE  PREMIER

                                                    Pansez

        [Que] vous estes mon espérance.

        Fleur de beaulté, ma seulle soufissance ⁸⁸,

180  Souffisante sur toutes les viventes,

        Vivant soulas ⁸⁹ au millieu des plaisantes :

        Plaisir me croist ⁹⁰ quen[t] vous voy, sans doubtance.

        Doubte ⁹¹ n’ay point, tant ay grande fience,

        Fïent de vous ⁹² où j’ay my[s] mes actentes,

185           Fleur de beauté.

        La peur que j’ay, c’est qu’envers vous offence ⁹³ :

        Offensses ⁹⁴, las, ce sont choses dolentes.

        Do(u)lent seroit mon cueur en toutes sentes ;

        Sentez-le ⁹⁵ brief morir de desplaisance,

190           Fleur [de beaulté] ⁹⁶.

                        LE  SECOND

        Lustre lustrant ⁹⁷, excellant, magniffique,

        Magniffiant cristalline coulleur,

        Couleur luysant : octroyez-moy faveur,

        Favorisant ma requeste autentique.

195  Autentiquez ⁹⁸ la douleur qui me picque :

        Piquez mon cueur par vostre grand doulceur,

                 Lustre [lustrant].

        Califfiez ce que je prenostique ⁹⁹,

        Prenostiquez ¹⁰⁰ par ardente ferveur,

200  [Fervente flamme et amoureuse ardeur !]¹⁰¹

        Ardez ¹⁰² mon cueur en vostre réthorique,

                 Lustre [lustrant] !

                        FOLIE

        Vrays amoreux ¹⁰³, venez-moy acoller !

        Collez ¹⁰⁴ celle qui vous donnera bruyt.

205  Bruyez ¹⁰⁵ partout : personne ne vous nuyt.

        Nuysans ne peulve[n]t mon vouloir désoler ¹⁰⁶.

        Désoléz puis-je bien [à poinct] consoler ;

        Co[n]solez-vous et de jour et de nuyt,

                 Vrays [amoreux].

210  Je faitz rire quent on devroit plourer ;

        Pleurer ne fault ¹⁰⁷ contre ce qui me duyt.

        Duyt[e] façon mon esperit conduyt ;

        Conduyre veulx voz faitz sans vïoler ¹⁰⁸,

                 Vrays [amoreux].

                        LE  PREMIER

215  Ung chascun doit bien carculler¹⁰⁹

        Le droit chemin où il veult tandre.

                        LE  SECOND

        Madame, vous devez entendre

        Que nous sommes deslibéréz

        De faire ce que vous vouldrez,

220  Et vous octroyons par accords

        Foy, loyaulté, mambres et corps :

        À vous servir sommes entiers.

                        FOLIE

        Il vous fauldroit estre gorriers.

        Car en habis où je vous voy,

225  Vous n’aurez point le cueur de moy

        – Combien que soubz h[u]mble[s] habitz

        Souventesfoys je me chevys¹¹⁰

        Aussi bien que soubz grans estatz¹¹¹.

        Et pource, ostez tous ces fatras !

230  Despoullez-vous ! Pour rabiller,

        D’aultres habitz vous veux ba[i]ller

        À la fasson de gorerie¹¹².

        Et affin que la gorre¹¹³ rie

        [Et que soyez dimanchereaulx,]¹¹⁴

235  Vestez-moy ces habitz nouveaulx

        Que j’ay pris à la frapperie¹¹⁵.

                        Lors se despoullent ¹¹⁶, et prenent

                        de[s] robes aux manches larges.

                        LE  PREMIER

        Voycy une¹¹⁷ grand trainnerie !

        Me fauldra-il cecy trainner ?

                        LE  SECOND

        Quelz grans manches¹¹⁸ !

                        LE  PREMIER

                                                   Quel rêverie !

                        LE  SECOND

240  Porter cecy ?

                        LE  PREMIER

                                C’est pour desver¹¹⁹ !

                        FOLIE

        Mai[n]s les portent¹²⁰ pour eulx parer.

                        LE  PREMIER

        Je ne sçay pas à quel propos.

                        FOLIE

        C’est la façon¹²¹, à brief parler.

                        LE  SECOND

        Corps bieu, ce sont habitz de Folz !

                        LE  PREMIER

245  L’on voit, par-darrière, noz colz¹²².

                        [ LE  SECOND

        Et ! pour sembler gorriers plus nouveaulx,¹²³

        Fault-il vestir telz paletotz¹²⁴ ? ]

                        FOLIE

        Il sont bons. Bien furent plus beaux

        Que les vielz. Gorriers [vielz manteaulx]¹²⁵

250  Changère[n]t, par leur grand prudence.

        Et puis affublez ces chappeaulx.

                        Ils pren[n]e[n]t des chappeaux [deschiquetés ¹²⁶].

        Or estes-vous gens d’apparence.

                        LE  PREMIER

        Madame, à vous avons fience.

                        FOLLIE

        Chaussez¹²⁷ ces soulliers pour galler.

                        Elle leur baille des soulliers larges ¹²⁸.

                        LE  SECOND

255  Ces soulliers, en ma conscience,

        Il me garderont [bien] d’aller¹²⁹ !

                        FOLIE

        Si fault-il le temps esgaller¹³⁰,

        Et marcher couraigeusemant.

        Et laissez mesdisans parler :

260  Pour eux, n’en aura autrement.

        Vivez orez gorrièremant. ¹³¹

        Quand est¹³² de vostre habillement,

        Les robes porterez mal faictes,

        Tant que semblerez proprement

265  Estre personnes contrefaictes :

        Faictes-vous bossus, si ne l’estes.

        Grans manches plus que Cordelliers¹³³,

        Chappeaux de travers et cornette[s],

        Bonnet sur l’ueil¹³⁴, larges so[u]lliers.

270  Soyez, en voz faiz, singulliers¹³⁵,

        Et comme les princes vestus ;

        Et – fussiez filz de charpentiers –

        Fier[s], orguilleux, folz et testuz.

        Dictes que vous avez escus

275  Là où vous estes empreunteurs.

        Et au lieu de toute[s] vertuz,

        Soyez mesdisans et flacteurs¹³⁶.

        Mes amoureux, mectez voz cueurs

        D’acomplir mes [communs esdiz]¹³⁷ !

                        LE  PREMIER

280  Comme voz loyaulx serviteurs.

        Nulz d’eux n’en seront escondiz¹³⁸.

                        LE  SECOND

        Madame, mes faiz et mes ditz

        Sont avec vostre pancemant¹³⁹.

                        LE  PREMIER

        Ne plaise à Dieu de paradis

285  Que nous gouvernons¹⁴⁰ aultremant !

                        FOLIE

        Vivez ores gorrièrement.

        Que vous fault-il plus ?

                        LE  SECOND

                                               Plus qu’assez.

                        FOLIE

        Et quoy ?

                        LE  PREMIER

                          Argent, premièrement.

                        [ FOLIE

        Vivez ores gorrièrement. ]

                        LE  SECOND

290  C’est le principal fondement.

                        FOLIE

        Vandez.

                        LE  PREMIER

                      Et quoy ?

                        FOLIE

                                       Des  biens amassés.

        [ Vivez ores gorrièrement.

        Que vous fault-il plus ? ]

                        LE  SECOND

                                                [Plus qu’assez¹⁴¹ :]

        Et où pris ?

                        FOLIE

                             Ceulx des trespasséz¹⁴².

                        LE  PREMIER

295  Par ma foy ! ceulx-là sont passéz.

                        FOLIE

        De ceulx donc(ques) de voz pancïons¹⁴³.

                        LE  SECOND

        Ce sont toutes abusions ;

        On ne nous sçauroit rien oster¹⁴⁴.

        Et si, nous fault provisions

300  De chevaulx pour nous [bien] monster¹⁴⁵,

        Chaînes d’or¹⁴⁶ pour nous acoustrer,

        Robes quent les nostres fauldront¹⁴⁷,

        Noz soulliers fère carreller¹⁴⁸

        (Car tantost¹⁴⁹, guyère ne vauldront).

                        FOLIE

305  Quant ces choses vous assauldront¹⁵⁰,

        Pour survenir à vostre affaire,

        Empruntez.

                        LE  PREMIER

                              Dea ! mais qui seront

        Ceulx qui ainsi le vouldront fère ?

                        LE  SECOND

        Cuydez-vous qu’on nous veulle croire¹⁵¹ ?

                        FOLIE

310  [Vous] croire ? Et pourquoy ne feront ?

                        LE  PREMIER

        Nostre fait, qui est voluntaire¹⁵²,

        Et noz habictz l’ampescheront.

                        LE  SECOND

        Bien y a pis : il s’en riront.

                        LE  PREMIER

        Or prenons que l’on le nous preste ;

315  Et ! ceulx qui le nous presteront,

        En fin, estre payé[z] vouldront.

        Où¹⁵³ pris ?

                        FOLIE

                              Vous vous rompez la teste :

        La belle quinquenelle¹⁵⁴ honneste !

        Et si s’en veulle[n]t [plus] desbatre,

320  Si les menassez de [les] batre.

                        LE  SECOND

        Il n’y a deux, ny troys, ny quatre.

        Point ne nous y fault varier¹⁵⁵.

                        LE  PREMIER

        À telz jeux ne se fault esbatre :

        Il nous contraindront de payer.

                        FOLIE

325  Il leur fault le débet¹⁵⁶ nyer.

                        LE  SECOND

        Tel(le)s excusas[s]ïons sont lourdes.

                        LE  PREMIER

        Quel remède ?

                        FOLIE

                                 Après leur crier¹⁵⁷,

        Payez-les.

                        LE  SECOND

                           Et de quoy ?

                        FOLIE

                                                  De bourdes¹⁵⁸.

                        LE  PREMIER

        Bourdes ? C’est affaire à gens sourdes.

330  Maiz cuydez-vous qu’on nous en croye ?

                        FOLIE

        Ouÿ, car c’est bonne monnoye¹⁵⁹.

        Car mains¹⁶⁰, par bourdes, on[t] esté,

        Sans sçavoir¹⁶¹, en auctorité,

        Les petiz mis en grans estas,

335  Et les grans, du tout mys au¹⁶² bas

        De maintes diverses personnes.

                        LE  SECOND

        Je croy que bourdes sont donc(ques) bonnes.

                        FOLIE

        [Pour monster, mes très chiers anffans,]¹⁶³

        Accoinctez-vous tousjours des grans :

340  Grans, en bref temps, font sans actendre

        Pouvres monster, riches descendre.

        Et si, font (tel en est l’usaige)

        Le saige fol, et le fol saige.

        Et qui pis est, le plus souvent,

345  Baille[n]t bourdes en payement¹⁶⁴.

                        LE  PREMIER

        Enseignez-nous donc par quel guise¹⁶⁵,

        Soit en cherges¹⁶⁶ ou en Esglise,

        Pouvons avoir gouvernement¹⁶⁷.

                        FOLIE

        Baillez bourdes en payement.

                        LE  PREMIER

350  S’amoreux devenir voulloye

        D’aultre que vous (je ne vouldroye !),

        Quel remède ? Point n’ay d’argent¹⁶⁸.

                        FOLIE

        Baillez bourdes en payement.

                        LE  SECOND

        Je doy, et d’argent n’ay-je point.

355  De contrainctes¹⁶⁹ chascun me point

        Jusques à emprisonnement.

                        FOLIE

        Baillez bourdes en payement.

                        LE  PREMIER

        Quel remède à ces advocas ?

        Car, quent il ont broullé ung cas¹⁷⁰,

360  Payer on ne le[s] scet comment.

                        FOLIE

        Baillez bourdes en payement.

                        LE  SECOND

        Ho,  madame, vous vous abusez,

        Car advocatz sont si rusés !

        Et d[r]ames¹⁷¹ ont à prandre apris.

                        FOLIE

365  Le plus [rouge y est]¹⁷² souvent pris ;

        Car, quent bourdes sont autentiques,

        Les empruncteurs devien[n]ent quictes,

        Et ceulx qui prestent¹⁷³, indigens.

                        LE  PREMIER

        De bailler bourdes, dilligens

370  Serons ; de ce, ne doubtez point.

        Mais il y a ung aultre point :

        S’on nous voulloit bourdes bailler,

        Quel remède ?

                        FOLIE

                                  Le[s] rabiller¹⁷⁴.

                        LE  SECOND

        [Dea !] maiz commant ?

                        FOLIE

                                                 En babillant¹⁷⁵.

                        LE  PREMIER

375  On voit souvant homme baillant

        Qui n’est pas reppeu¹⁷⁶ de bailler.

                        FOLIE

        Brief, si vous voullez travailler¹⁷⁷,

        Vous aurez plus que ne vous voy¹⁷⁸.

        Mes très chiers anffens, quant vous voy,

380  Mon estommac, sans divertir¹⁷⁹,

        Est ouvert pour vous englotir,

        Tant aprochez de ma nature¹⁸⁰.

                        LE  PREMIER  GORRIER

        Nostre esperit tousjours procure¹⁸¹

        À toutes fins de vous complaire.

                        FOLIE

385  Ainsi le devez-vous bien faire :

        Car celle suis par qui serez

        (Selon que vous me servirez)

        Grans ou petiz, pouvres ou riches.

        Mes dons ne sont eschars¹⁸² ny chiches ;

390  Ne serviteurs habandonnéz,

        Qui se seront à moy donnéz,

        Comme vous, lesqueulx¹⁸³ j’ay receux.

        Et vous, comme les bien écheux¹⁸⁴,

        Avez promis de me servir.

395  N’avez pas ?

                        LE  SECOND

                               Jusques au morir !

                        LE  PREMIER

        D’en doubter seroit grand simplesse.

                        FOLIE

        Trouvé avez bonne maistresse.

        Maiz je vous ay encore à dire¹⁸⁵.

        Soyez tousjours prestz de mesdire,

400  Et notez ceste auctorité :

        Qui vivre veult en grand prospérité

        Se doit garder de dire vérité,

        Promectre assez, et du tout, rien tenir ¹⁸⁶.

        Par mesdire se doit entretenir

405  Selon le temps et l’oportunité,

        Mordre en riant ¹⁸⁷ par grand subtilité ;

        Là où il verra avoir gratuïté ¹⁸⁸,

        Pour son proffit, chascun entretenir,

                 Qui [vivre veult]¹⁸⁹.

410  Flater les grans par importunité,

        Complaire à ceulx qui ont auctorité,

        Ne payer riens et l’aultruy ¹⁹⁰ retenir

        Font les meschans aux grans estas venir,

        Soubz le dangier d’estre décapité ¹⁹¹,

415           Qui [vivre veult].

                        LE  SECOND

        Se nous avons habilité¹⁹²,

        Nous serons souverains ouvriers.

                        Il se premène[n]t.¹⁹³

.

                        FOLIE                                                     SCÈNE  III

        Regardez marcher mes gorriers

        Aux larges manches, grans souliers,

420  Parrucque d’estrange poil faicte ¹⁹⁴,

        Mais ¹⁹⁵ – n’esse pas bonne sournète ? –

        Pouvrement pourveu[s] de deniers.

        C’est l’espargne des cousturiers ¹⁹⁶.

        Leur reffuge e[s]t aux taverniers,

425  Et à l’ospitail leur retraite ¹⁹⁷.

                 Regardez !

        D’empreunter souverains ouvriers ¹⁹⁸,

        De randre mauvèz coustumiers ¹⁹⁹ ;

        Gens expers ²⁰⁰ pour fère une amplecte

430  En une botique replecte ²⁰¹

        De tous les dix[-et-]sept mestiers ²⁰².

                 Regardez !

                               *

                        LE  PREMIER ²⁰³                                 SCÈNE  IV

        Je me regarde²⁰⁴ voluntiers,

        Hault et bas et en tous endroys.

                        LE  SECOND

435  Plus regarde, et moins me congnoys :

        Je ne suis plus moy, si me semble.

                        LE  PREMIER

        Je ne sçay [à qui]²⁰⁵ je [res]semble ;

        Je ne suis point.

                        LE  SECOND

                                  Et ! qui²⁰⁶ peust-ce estre ?

                        LE  PREMIER

        Je ne suis ne varlet ne maistre,

440  Et ne sçay se je suis ou non²⁰⁷.

                        LE  SECOND

        Se  ne suis-je pas.

                        LE  PREMIER

                                      Ce  ne suis-je mon²⁰⁸.

        Point ne suis moy, certainement.

                        LE  SECOND

        Maiz qu’en ditz-tu, par ton serment ?

        Suis-je ?

                        LE  PREMIER

                         Tu es. Et moy non, rien.

                        LE  SECOND

445  Par sainct Jacques ! je te voy bien :

        Tu es toy. Et moy, riens quelzconques.

                        LE  PREMIER

        Et qu’es-tu donc ?

                        LE  SECOND

                                      Je ne fuz oncques.

                        LE  PREMIER

        Tu n’ez ? Tu es, je le congnois !

        Et moy, non.

                        LE  SECOND

                               Tu te mescongnoys :

450  Tu as esté, et si, seras.

        Non pas moy.

                        LE  PREMIER

                                 Tu en mantiras²⁰⁹,

        Je le voy bien, car tu es toy.

        Et congnoys²¹⁰ que ne suis pas moy.

                        LE  SECOND

        Je suis moins que toy la moitié.

                        LE  PREMIER

455  Hélas, tu me faitz grand pitié !

        Je croy que tu es insensé :

        Je te voy bien.

                        LE  SECOND

                                C’est bien avancé !

        Tu resves, tu es tourmenté.

                        LE  PREMIER

        Non suis. Et si, n’ay point esté :

460  Se j’avoye esté, je seroye,

        Comme quent j’ay esté, j’estoye.

        Maiz on te congnoît à tes faitz.

                        LE  SECOND

        Par ma foy ! je ne fuz jamaiz.

        Maiz tu es toy, aussi craché

465  Comme qui t(e) auroit arraché

        D’ung mur²¹¹. Tu es, et [si], seras :

        Je te congnoys.

                        LE  PREMIER

                                  À quoy ?

                        LE  SECOND

                                                   Au bras,

        Au nez, au visaige et aux mains.

                        LE  PREMIER

        Dea ! tu es toy, ny plus ny moins²¹².

470  Maiz moy, c’est aultre personnaige.

                        LE  SECOND

        Je te congnoys bien au visaige.

        Maiz moy, je ne me congnoys pas²¹³.

                        LE  PREMIER

        Non faiz-je pas, moy.

.

                        FOLIE                                                     SCÈNE  V

                                             Parlez bas :

        Avant que partez de mes mains,

475  Vous vous congnoistrez ancor(e) moins,

        Car je vous ayme et je²¹⁴ vous prise.

        Quant vous verrez la nappe mise,

        Entretenez-vous par falaces²¹⁵ ;

        Mais n’en parlez jusqu(es) après grâces²¹⁶.

480  Et pour entretenir les folz,

        Accordez-leur tous leurs propos²¹⁷.

        Et si vous faictes ne sçay quoy

        De mal, dictes qu’estes à moy

        Et que je le vous ay fait faire.

                        LE  PREMIER

485  Madame, [l’on] vous vouldroit plaire :

        Or, nous desclarez²¹⁸ vostre nom,

        Nous vous en prion.

                        FOLIE

                                           J’ay renon

        Entre toutes gens et partout.

        Vous ne sçariez jamais le bout

490  De mon sens et ma renommée.

                        LE  SECOND

        Maiz commant estes-vous nommée ?

        Nous avons, le temps de noz vies,

        Voz ordonnances accomplies ;

        Et si²¹⁹, ne sçavons qui vous estes.

                        FOLIE

495  Vous vivez doncques comme bestes ?

        J’ay tousjours avec vous esté :

        [Aus]si, vous avez conquesté

        Des biens, de l’onneur et du pris.

        Ne me tenez point à despris²²⁰,

500  Car de²²¹ plus grans souvent me prisent.

        D’aultres [y a]²²² qui me desprisent,

        Maiz je ne m’en soucie point.

                        LE  PREMIER

        Plaise-vous ent[end]re ce point²²³,

        Dame, et vostre nom déclarer.

                        LE  SECOND

505  Volu vous avons repa[i]rer²²⁴

        Et obéyr, comme sçavez,

        Sans sçavoir vostre²²⁵ nom.

                        FOLIE

                                                      Lisez !

                        Folie monstre l’escripture.

        Mon nom verrez, et ma science.

                        LE  PREMIER

        Nous ne sçaurions.

                        FOLIE

                                        Oultrecuidance²²⁶,

510  Mon filz, l’a escript de sa main,

        – Qui est bien notable escripvain –,

        D’une²²⁷ des pleumes de folie.

                        LE  SECOND

        Et ! pour Dieu, vostre non !

                        FOLIE

                                                     Folie,

        Puisque sçavoir [vous] le voullez.

                        LE  PREMIER

515  Madame, vous vous rigollez

        De nous ? Pour Dieu, ne vous desplaise !

                        LE  SECOND

        Nous sommes en si grand malaise

        De sçavoir qui servy avons

        Que riens plus sçavoir ne volons²²⁸.

520  J’en languys²²⁹.

                        LE  PREMIER

                                    Aussi fai-ge, moy.

                        FOLIE

        Je suis Folie, par ma foy !

                        LE  SECOND,  admirando.²³⁰

        Folie ?

                        LE  PREMIER

                      Bien nous faictes paistre !

                        FOLIE

        Folie suis et le veux estre.

        Je le seray et [l’]ay esté²³¹.

                        LE  SECOND

525  Folie ?

                        LE  PREMIER

                       Bénédicité !

                        LE  SECOND

        Vécy bien grand mélencolie²³² !

        Mais qui nous gouverna²³³ ?

                        FOLIE

                                                       Folie.

                        LE  PREMIER

        Nous le devons ainsi entendre.

                        LE  SECOND

        Je ne le sçauroye comprandre.

530  Nous avons heu tant de faveurs

        Entre prélatz et grans seigneurs !

        Mais dont vient ceste resverie ?

                        FOLIE

        De moy.

                        LE  PREMIER

                        Pourquoy ?

                        FOLIE

                                           Je suis Folie.

                        LE  PREMIER

        Nous avons heu de grans offices ;

535  Et tous noz parens, béneffices.

        De rien²³⁴, venu[s] en seigneurie,

        Qui en fut cause²³⁵ ?

                        FOLIE

                                             Qui ? Folie.

        Car Folie vous entretaint ;

        À tort, à droit, la main vous tint²³⁶

540  En parfaicte gaudisserie²³⁷.

                        LE  SECOND

        Quel en sera la fin ?

                        FOLIE

                                          Folie.

                        LE  PREMIER

        Elle le dit, et le fault croire.

                        LE  SECOND,  a[d]mirando.

        [Quoy !] Folie ?

                        LE  PREMIER

                                    Il est tout notoire²³⁸ :

        Elle nous a ainssi menéz.

                        LE  SECOND

545  Nous a Folie gouvernéz ?

                        FOLIE

        Ouÿ dea ! Et par mon moyen

        Avez, là où vous n’eussiez rien :

        Car pas n’avez capacité

        D’avoir, par sens²³⁹, auctorité.

550  Folie suis, n’y pancez plus.

                        LE  PREMIER

        Quel remède ?

                        LE  SECOND

                                   Il en est conclus²⁴⁰.

                        LE  PREMIER

        Dea ! il y a folie[s] maintes :

        Folie[s] plaisantes et faintes²⁴¹.

                        LE  SECOND

        Tout procède de la cervelle.

                        FOLIE

555  Je suis Folie naturelle,

        Plaisant²⁴² Folie lunatique,

        Folie en folie autentique.

        N’an ayez plus [tant] de mésaise,

        Car plus grans (ne vous en desplaise)

560  Que vous ont eu, par mon service,

        Et prélature et bénéfice,

        Et mariage en grans maisons.

                        LE  PREMIER

        Elle dit de grandes raisons,

        Mais je ne m’en puis contenter.

565  Car chascun se pourra vanter

        – Et dira vray, je vous affie –

        Que nous avons heu par Folie

        Estatz, biens, honneurs et chevence.

        Ce nous est une grand²⁴³ meschance ;

570  Je ne me puis point trop douloir²⁴⁴.

                        FOLIE  ostera ce qu’elle aura sur la teste, et aura ung

                        bonnet où il y aura des oreilles et des cornes ²⁴⁵. Et dit :

        Puisque vous voulez tant sçavoir

        De moy, et don[t] je suis venue,

        Regardez-moy. Je suis cornue ;

        Et si, suis Foll[i]e cornarde,

575  Cornant, cavilleuse, coquarde²⁴⁶,

        Coquillarde, coquillonn[é]e²⁴⁷,

        Arrogante, désordonn[é]e,

        Aux folz plaisant[e] et desplaisante,

        Mordant²⁴⁸, malureuse, cuisante,

580  Mesdisant, de tous vices plaine,

        Troubl[é]e²⁴⁹, faulce et inhumaine,

        Trist[ress]e²⁵⁰, ingnorante, perverse,

        Rude, cautelleuse, diverse,

        Rigoureuse, rétrogradant²⁵¹,

585  [De mes yeux desloyaulx dardant]

        De[s] regars félon[s], sans accors²⁵²,

        Mère et nourrisse de Discors,

        Discordant en tous [les] passaige[s],

        Passant²⁵³ partout plaine d’oubtraiges,

590  Oultraigeuse en toute maison,

        Maisonnière²⁵⁴ contre raison,

        Résonnaible en²⁵⁵ faiz détestables,

        Détestant les chose[s] estables²⁵⁶,

        [Estant de veulle voulenté]²⁵⁷,

595  Voulant avoir auctorité,

        Auctorisant toutes frivolles,

        Frivolant en toutes escolles,

        Escollière de toute manterie,

        Manterres[s]e par flacterie,

600  Flactant pour cuyder myeulx valloir,

        [Vallant vostre]²⁵⁸ petit pouvoir,

        [Pouvant anuler]²⁵⁹ contrediz,

        Contredisant commun[s] esdiz,

        Édiffiant par artiffice,

605  Artifficiant²⁶⁰ en mallice,

        Et, pour toute conclusion,

        Toute plaine d’abusion.

        C’est ma²⁶¹ commune renommée.

        J’ay mainte maison gouvernée,

610  Et plusieurs folz hommes conduitz.

        Et pour ce, se je vous ay duitz²⁶²

        Selon la règle de ce temps,

        N’en devez estre mal contens :

        Car vous en serez, pour tous lotz,

615  En la fin, réputéz pour folz.

        Et ayez de moy souvenance !

                               *

                        LE  FOL ²⁶³                                           SCÈNE  VI

        Somme toute, de la plaisance

        Qu’on advoit [à] ce compte²⁶⁴ prise,

        En ce compris l’o[u]trecuidance

620  Et la glorieuse arrogance

        Qui est dedans leurs teste[s]²⁶⁵ mise ;

        Aus[s]i ce que chascun se prise

        [Cinq cens]²⁶⁶ frans deux solz justement ;

        En ostant les [sols instament]²⁶⁷,

625  [Et] au regard de la despance

        Du conte²⁶⁸ bien examinée,

        De regretz et de desplaisance

        Par faulte de dame Finence,

        Avec expérance finée²⁶⁹

630  En plaine audience affinée ;

        Cinq cens frans, se bien le notez,

        Quant les frans²⁷⁰ en seront ostéz,

        Ainsi compté [et] rabatu,

        Et veu mandemens et acquitz,

635  Et le compte bien débatu

        Et en plain barreau²⁷¹ conbatu,

        Tellement qu’on ne sçaura pis,

        Avaluéz tous lez respis²⁷²,

        Autant les petiz que les gros :

640  Brief, il ne reste que deux solz²⁷³ !

.

                               EXPLICIT

*

.

Le manuscrit propose ensuite une Bergerie de 10 sixains pentasyllabiques, généralement qualifiée de « fort ordurière », si bien que nul n’avait encore osé la publier. Sous le titre Pour une bergerie, les vers 37-42 ont été inclus abusivement dans certains manuscrits des Dictz moraulx pour faire tapisserie, d’Henri Baude. Le plus curieux c’est qu’au XVI^e siècle, pour compléter le présent manuscrit, on a fait suivre notre Bergerie par un quatrain proverbial illustré, à la manière des Dictz moraulx de Baude. Voici ce quatrain :

            Quant jeune fuz, en médisant de toutes,

            [D’aucun encore]²⁷⁴ esté priée n’avoye.

            Vielle²⁷⁵ devins ; maiz ainsi que filloye,

            Le feu se print, fillant, en mes estouppes²⁷⁶.

Cette bergerie, contrairement à d’autres²⁷⁷, n’est pas une œuvre dramatique. Les rubriques portent exclusivement « le Bergier » et « la Bergière » ; pour plus de clarté, je rends aux pastoureaux leur nom traditionnel, tel qu’il figure dans le texte. On remarquera que les pastourelles sont fringantes et pleines d’allant, mais que la réponse du berger à la bergère laisse à désirer. Bref, l’heure du berger n’est pas encore venue, ou elle est déjà passée ; ou alors, ces descendants de Corydon n’ont pas besoin des femmes…

.

BERGERIE

                 [THOMAS]

      J’ay mes amourettes

      Nouvellement faictes

      En la garde-robe²⁷⁸.

                 GUILLEMECTE

      S’elle[s] sont discrectes,

5    Tien-les si secrectes

      Qu’on ne les desrobe.

                 THOMAS

      Danceras-tu pas,

      S’il advient le cas,

      Au²⁷⁹ son [d’]instrument ?

                 GUILLEMECTE

10  Je ne sçay, Thomas :

      On dit que tu as

      Mauvèz « instrument²⁸⁰ ».

                 MARGOT

      Monte sus²⁸¹, Thibault :

      Tu sçauras que vault

15  D’Amours le devitz²⁸².

                 THIBAULT

      Il fait trop grand chault,

      Car monter si hault

      Sans aide ne puis.

                 BIÉTRIX

      Dançons à l’ombraige,

20  Dans ce verbocaige²⁸³,

      Quelque bonne « dance ».

                 ROBIN

      Biétrix, tu dis raige !

      J’ay bien le couraige,

      Nompas la puissance…

                 BIÉTRIX

25  De fin cueur courtoys,

      M’amour²⁸⁴, en ce boys,

      Te sera donnée.

                 ROBIN

      Tu es, je congnois,

      Large en²⁸⁵ tous [en]drois,

30  Et habandonnée²⁸⁶.

                 GUILLEMECTE

      Allons sur l’arbète²⁸⁷

      Avec ta « musète²⁸⁸ »,

      Et déportons-nous²⁸⁹.

                 THOMAS

      Le son, Guillemecte,

35  Où que je me mette²⁹⁰,

      Ne m’est plus si doulx.

                 MARGOT

      Tire dans ma mote²⁹¹

      Par-des[s]oubz ma cotte,

      Se tu veulx rien prandre²⁹².

                 THIBAULT

40  Margot, tu es sote !

      Mon « arc » broye et frotte²⁹³,

      Mais je [ne] puis tandre²⁹⁴.

                 ROBIN

      Sur le tronc Biétrix²⁹⁵,

      D’ung greffe bien pris

45  Je [veulx faire une]²⁹⁶ ante.

                 BIÉTRIX

      Robin : tost repris

      Sera[s], s’il [n’]est mys

      Tout droit dans la fente !

                 MARGOT

      Broye²⁹⁷ en mon « mortier » :

50  Bon est, et entier ;

      Ne te veulles faindre²⁹⁸ !

                 THIBAULT

      C’est pour moy terrier²⁹⁹

      Si parfont et fier³⁰⁰

      Que n’y puis atteindre³⁰¹.

                 GUILLEMECTE

55  Quant on se marie,

      C’est plaisante vie

      Plaine de liesse.

                 THOMAS

      Ce point je te nye,

      Car c’est grand folie

60  De prandre maistresse.

*